पुणे आरटीओ कार्यालयासमोर ‘निर्भीड वर्तमान फाउंडेशन’चे आमरण उपोषण सुरू; पहिल्याच दिवशी प्रशासनाचे धाबे दणाणले!

पुणे: पुणे शहरात घरगुती व व्यावसायिक एलपीजी (LPG) गॅस सिलिंडरची कालबाह्य, विना-फिटनेस आणि नियमबाह्य वाहनांतून होणारी जीवघेणी वाहतूक रोखण्यात प्रादेशिक परिवहन कार्यालय (RTO) अपयशी ठरल्याचा आरोप करत, ‘निर्भीड वर्तमान फाउंडेशन’च्या वतीने आज, मंगळवार, ३ नोव्हेंबर २०२६ पासून पुणे आरटीओ कार्यालयासमोर बेमुदत आमरण उपोषण सुरू करण्यात आले आहे. उपोषणाच्या पहिल्याच दिवशी सामाजिक आणि नागरी वर्तुळातून मोठा पाठिंबा मिळाला असून, आंदोलकांच्या आक्रमक भूमिकेमुळे आरटीओ प्रशासनाचे धाबे दणाणले आहेत.

प्रशासनाच्या दुर्लक्षामुळे आंदोलनाचा पवित्रा

पुणे शहरात रस्त्यांवर धावणाऱ्या गॅस वितरण वाहनांचे फिटनेस प्रमाणपत्र (Fitness Certificate), विमा आणि पीयूसी नसणे, गॅस वाहतुकीसाठी आवश्यक वायुवीजन (Ventilation) नसलेली धोकादायक बंद पत्र्याची बॉडी असणे, अग्निशामक उपकरणांचा अभाव तसेच चालकांकडे धोकादायक मालवाहतुकीचा (Hazardous Goods) परवाना नसणे अशा अत्यंत गंभीर बाबी समोर आल्या होत्या.

या जीवघेण्या प्रकाराबाबत निर्भीड वर्तमान फाउंडेशनचे संस्थापक-संचालक आयु. श्रीकांत दारोळे यांनी १२ ऑक्टोबर २०२६ रोजी आरटीओ प्रशासनाकडे पुराव्यानिशी लेखी तक्रार दाखल केली होती. त्यानंतर २६ ऑक्टोबर रोजी स्मरणपत्र देऊन प्रशासनाला कारवाईचा लेखी कृती आराखडा सादर करण्यासाठी २ नोव्हेंबरपर्यंतची अंतिम मुदत दिली होती. मात्र, निष्पाप पुणेकरांच्या जिवाशी खेळ सुरू असतानाही आरटीओ अधिकाऱ्यांनी कोणतीही ठोस कारवाई अथवा तपासणी मोहीम न राबविल्याने अखेर आजपासून हे शांततामय मार्गाने आमरण उपोषण सुरू करण्यात आले.

उपोषणकर्त्यांच्या प्रमुख मागण्या:

१. कालबाह्य व अनफिट वाहने स्क्रॅप करा: वय संपलेली, नापास झालेली आणि योग्यता प्रमाणपत्र नसलेली सर्व गॅस वाहने तात्काळ जप्त करून त्यांची नोंदणी रद्द (स्क्रॅपिंग) करण्याचे आदेश द्यावेत.

२. बंदिस्त वाहनांचे परवाने रद्द करा: वायुवीजन नसलेली, बेकायदेशीरपणे बंद पत्र्याची बॉडी तयार करून फिरणाऱ्या वाहनांचे वाहतूक परवाने जागेवरच रद्द करावेत.

३. चालक व गॅस एजन्सींवर फौजदारी कारवाई: विशेष प्रशिक्षण व परवान्याशिवाय चालकांकडून वाहने चालवून नागरिकांचा जीव धोक्यात घालणाऱ्या संबंधित गॅस एजन्सी मालकांवर व चालकांवर आरटीओने थेट गुन्हे दाखल करावेत.

४. एजन्सींचे व्यावसायिक परवाने निलंबित करा: नियमभंग करणाऱ्या गॅस एजन्सींची जबाबदारी निश्चित करून त्यांचे वाहतूक परवाने निलंबित करावेत.

५. स्वतंत्र नियंत्रण कक्ष व नोडल अधिकारी: रस्त्यांवर नियमबाह्य वाहने दिसल्यास नागरिकांना व कार्यकर्त्यांना थेट माहिती देण्यासाठी आरटीओने स्वतंत्र नोडल अधिकारी नेमावा व त्यांचा संपर्क क्रमांक जाहीर करावा.

६. लेखी कृती अहवाल व वेळापत्रक द्या: १२ ऑक्टोबरपासून आजपर्यंत आरटीओने किती वाहनांवर कारवाई केली याचा अधिकृत स्वाक्षरीसह अहवाल द्यावा आणि शहरातील सर्व वाहनांच्या १००% तपासणीचे लेखी वेळापत्रक जाहीर करावे.

आरपारची लढाई; माघार नाही!

आज पहिल्या दिवशी फाउंडेशनचे पुणे शहर उपाध्यक्ष आयु. स्वप्निल जगताप आणि पुणे उप जिल्हाध्यक्ष आयु. ज्ञानेश्वर आखाडे हे प्रत्यक्ष आमरण उपोषणाला बसले आहेत. त्यांच्या समर्थनार्थ व हक्काच्या या लढ्यात पुणे जिल्हाध्यक्ष आयु. फिरोज शेख हे देखील पूर्ण वेळ सोबत उपस्थित राहून ठामपणे पाठीशी उभे आहेत. आंदोलनाच्या ठिकाणी पदाधिकाऱ्यांनी ठाम भूमिका मांडली की, “जोपर्यंत आरटीओच्या सक्षम अधिकाऱ्यांच्या स्वाक्षरीसह ठोस कारवाई सह लेखी आदेश आणि कृती आराखडा दिला जात नाही, तोपर्यंत हे उपोषण मागे घेतले जाणार नाही. उपोषणकाळात उपोषणकर्त्यांच्या प्रकृतीस काही अपाय झाल्यास त्याची संपूर्ण जबाबदारी आरटीओ प्रशासनाची असेल,” असा स्पष्ट इशाराही यावेळी देण्यात आला.

या आंदोलनाची प्रत परिवहन आयुक्त (महाराष्ट्र राज्य), पुणे जिल्हाधिकारी, पुणे पोलीस आयुक्त आणि बंडगार्डन पोलीस ठाण्याला अग्रेषित करण्यात आली आहे. पहिल्याच दिवशी आंदोलनाला परिसरातील नागरिक आणि विविध सामाजिक संघटनांनी भेट देऊन पाठिंबा दर्शवला असून, आता आरटीओ प्रशासन काय पाऊल उचलते, याकडे संपूर्ण पुणे शहराचे लक्ष लागले आहे.

#पुणेआरटीओ #एलपीजीसुरक्षा #निर्भीडवर्तमान

संबंधित बातमी: पेटनाका परिसरात ‘काळा-पिवळा’ जुगाराचा उघड अड्डा; प्रशासनाची डोळेझाक का?