तृतीयपंथीयांना लोकसभा निवडणूक लढण्याचा पूर्ण अधिकार; रिपाइंतर्फे उमेदवारी देणार: केंद्रीय राज्यमंत्री रामदास आठवले यांची घोषणा

मुंबई:

“तृतीयपंथीय हे भारताचे सन्माननीय नागरिक आहेत. त्यांना मतदानाच्या हक्कासोबतच विधानसभा आणि लोकसभा निवडणूक लढण्याचाही पूर्ण घटनात्मक अधिकार आहे. तृतीयपंथीयांनी मुख्य प्रवाहात येऊन राजकारणात सक्रिय व्हावे; माझ्या पक्षात आल्यास त्यांना लोकसभा निवडणुकीसाठी नक्की उमेदवारी दिली जाईल,” अशी ग्वाही रिपब्लिकन पार्टी ऑफ इंडियाचे (आठवले) राष्ट्रीय अध्यक्ष आणि केंद्रीय सामाजिक न्याय राज्यमंत्री रामदास आठवले यांनी दिली.

मुंबईतील ‘द ललित’ हॉटेलमध्ये आयोजित ‘ट्रान्सजेंडर अवॉर्ड’ वितरण सोहळ्यात ते प्रमुख पाहुणे म्हणून बोलत होते. यावेळी समाजातील विविध क्षेत्रांत उल्लेखनीय कार्य करणाऱ्या मान्यवरांना आठवले यांच्या हस्ते ‘प्राइड इन पॉवर अवॉर्ड’ने सन्मानित करण्यात आले.

कार्यक्रमादरम्यान तृतीयपंथी समुदायाच्या प्रतिनिधींनी राज्यसभेत एका जागेच्या आरक्षणाची मागणी आठवले यांच्याकडे लावून धरली. या मागणीला उत्तर देताना ते म्हणाले, “राज्यसभेत आरक्षणाची तरतूद नसली, तरी तृतीयपंथीयांना थेट जनतेतून लोकसभेची निवडणूक लढण्याचा अधिकार नक्कीच आहे. यापूर्वीही माझ्या पक्षाने गुजरातमध्ये एका तृतीयपंथी व्यक्तीला निवडणूक रिंगणात उतरवून उमेदवारी दिली होती. भविष्यातही रिपब्लिकन पक्ष तृतीयपंथी उमेदवारांच्या पाठीशी खंबीरपणे उभा राहील.”

पुढे बोलताना आठवले यांनी केंद्र सरकारच्या कल्याणकारी योजनांचा उल्लेख केला. “पंतप्रधान नरेंद्र मोदी यांच्या नेतृत्वाखालील केंद्र सरकारच्या सामाजिक न्याय आणि सबलीकरण मंत्रालयाच्या माध्यमातून अनुसूचित जाती, इतर मागासवर्गीय, दिव्यांग, ज्येष्ठ नागरिक आणि तृतीयपंथीय अशा सर्व घटकांच्या कल्याणासाठी अनेक प्रभावी योजना राबवल्या जात आहेत. तृतीयपंथीयांवर कुठेही अन्याय होऊ दिला जाणार नाही, त्यांना हक्काचा न्याय मिळवून देण्यासाठी रिपब्लिकन पक्ष सदैव कटिबद्ध राहील,” असा विश्वास त्यांनी व्यक्त केला.

या सोहळ्यास ज्येष्ठ अभिनेते किरण कुमार, न्यायमूर्ती आशा मेनन, सामाजिक कार्यकर्त्या लक्ष्मीनारायण त्रिपाठी, डॉ. सानवी जेठवानी, डॉ. अनमोल, आर्यन पाशान, रणजिता नायर, मोहिनी सुतार तसेच रिपाइंचे जिल्हाध्यक्ष अमित तांबे यांच्यासह तृतीयपंथीय संघटनांचे अनेक प्रतिनिधी व मान्यवर मोठ्या संख्येने उपस्थित होते.

संबंधित बातमी: केंद्रीय राज्यमंत्री रामदास आठवले यांनी घेतली राजस्थानचे राज्यपाल हरिभाऊ बागडे यांची सदिच्छा भेट; विविध सामाजिक विषयांवर प्रदीर्घ चर्चा