केंद्रीय राज्यमंत्री रामदास आठवले यांनी घेतली राजस्थानचे राज्यपाल हरिभाऊ बागडे यांची सदिच्छा भेट; विविध सामाजिक विषयांवर प्रदीर्घ चर्चा

जयपूर : केंद्रीय सामाजिक न्याय व सक्षमीकरण राज्यमंत्री आणि रिपब्लिकन पार्टी ऑफ इंडियाचे (आठवले) राष्ट्रीय अध्यक्ष रामदास आठवले यांनी राजस्थानचे राज्यपाल हरिभाऊ बागडे यांची जयपूर येथील लोकभवन (राजभवन) येथे सदिच्छा भेट घेतली. या भेटीदरम्यान दोन्ही नेत्यांमध्ये सामाजिक व राजकीय विषयांवर महत्त्वपूर्ण आणि प्रदीर्घ चर्चा झाली.

या बैठकीत राज्यपाल हरिभाऊ बागडे आणि ना. रामदास आठवले यांच्यात आंबेडकरवादी चळवळीचे ऐक्य तसेच रिपब्लिकन पक्षाच्या विविध घटकांच्या एकत्रीकरणाबाबत आस्थेवाईकपणे विचारविनिमय झाला. दलित, वंचित आणि शोषित घटकांच्या कल्याणासाठी आंबेडकरी चळवळीतील सर्व प्रवाहांनी एकत्र येणे काळाची गरज असल्याचे मत यावेळी व्यक्त करण्यात आले. याशिवाय, देशात आणि राज्यात सध्या विविध मुद्द्यांवरून सुरू असलेल्या आंदोलनांच्या पार्श्वभूमीवर व सद्य राजकीय परिस्थितीवरही दोन्ही नेत्यांमध्ये सविस्तर चर्चा झाली.

या महत्त्वपूर्ण बैठकीदरम्यान रिपब्लिकन पक्षाचे ज्येष्ठ नेते डॉ. राजेंद्र गवई हे देखील प्रामुख्याने उपस्थित होते. तसेच पक्षाचे राजस्थान प्रदेशाध्यक्ष राधामोहन सैनी, राष्ट्रीय सचिव प्रतिमा तोतला, नवरत्न गुशाईवाल, रमेश सैनी, अमर वीर सिंह यांच्यासह अनेक प्रमुख पदाधिकारी व मान्यवर उपस्थित होते.

भेटीनंतर उभय नेत्यांमध्ये अतिशय सकारात्मक आणि सौहार्दपूर्ण वातावरणात संवाद पार पडल्याचे पदाधिकाऱ्यांनी सांगितले.

संबंधित बातमी: शिवसेना खासदार अनिल देसाई यांनी घेतली रिपाई अध्यक्ष दिपक (भाऊ) निकाळजे यांची भेट; आरोग्याची चौकशी करत दिल्या शुभेच्छा