वंचित बहुजन आघाडीच्या लढ्याला मोठे यश; मुंबईतील रेल्वे लगतच्या ५,४५३ झोपड्यांवरील कारवाई स्थगित

विशेष प्रतिनिधी, मुंबई :

मुंबईतील कुर्ला, चेंबूर आणि ट्रॉम्बे परिसरातील रेल्वे मार्गालगत असलेल्या ५ हजार ४५३ झोपड्यांवर रेल्वे प्रशासनाकडून प्रस्तावित असलेली निष्कासनाची कारवाई अखेर स्थगित करण्यात आली आहे. रहिवाशांचे योग्य पुनर्वसन पूर्ण होईपर्यंत त्यांच्या घरांवर कोणताही हातोडा चालवला जाणार नाही, असा महत्त्वपूर्ण निर्णय घेण्यात आला आहे. वंचित बहुजन आघाडीच्या आक्रमक पाठपुराव्यामुळे आणि उच्च न्यायालयाच्या आदेशांच्या पार्श्वभूमीवर हजारो कुटुंबांवरील बेघर होण्याचे संकट टळले असून, हा झोपडपट्टीधारकांच्या हक्काचा मोठा विजय मानला जात आहे.

नेमकी पार्श्वभूमी काय होती?

मुंबई उच्च न्यायालयाने कुर्ला, चेंबूर आणि ट्रॉम्बे भागातील रेल्वे जमिनींवर वसलेल्या झोपड्यांचे निष्कासन करण्यापूर्वी रहिवाशांचे योग्य पुनर्वसन करण्याचे स्पष्ट निर्देश दिले होते. मात्र, पुनर्वसनाचा कोणताही ठोस आराखडा नसताना रेल्वे प्रशासनाने १७ नोव्हेंबर रोजी ५ हजार ४५३ झोपड्यांवर निष्कासनाची कारवाई करण्याचा निर्णय जाहीर केला होता. यामुळे अनेक दशकांपासून त्या भागात वास्तव्यास असणाऱ्या हजारो कुटुंबांमध्ये तीव्र संतापाचे व भीतीचे वातावरण निर्माण झाले होते.

बैठकीत घडामोडी आणि महत्त्वपूर्ण निर्णय

या गंभीर समस्येवर तोडगा काढण्यासाठी वंचित बहुजन आघाडीचे राष्ट्रीय अध्यक्ष ॲड. प्रकाश आंबेडकर यांनी राज्याचे उपमुख्यमंत्री तथा नगरविकास मंत्री एकनाथ शिंदे यांची भेट घेऊन सविस्तर चर्चा केली. या बैठकीदरम्यान:

• रेल्वेमंत्र्यांशी थेट संवाद : बैठकीदरम्यानच केंद्रीय रेल्वेमंत्र्यांशी दूरध्वनीवरून संपर्क साधून मुंबईतील रेल्वे लगतच्या वस्त्यांचा प्रश्न मांडण्यात आला.
• डीपीआरला मान्यता : रेल्वेच्या जमिनींवरील झोपडपट्टी पुनर्वसनासंदर्भात सविस्तर प्रकल्प अहवाल (DPR) तयार करण्यास रेल्वे मंत्रालयाने सहमती दर्शवली.
• कारवाईला तात्काळ स्थगिती : १७ नोव्हेंबर रोजी होणारी नियोजित निष्कासन मोहीम पूर्णपणे स्थगित करण्याचा निर्णय घेण्यात आला.

हक्काची घरे मिळेपर्यंत कारवाई नाही : ॲड. प्रकाश आंबेडकर

निर्णयानंतर प्रसारमाध्यमांशी बोलताना ॲड. प्रकाश आंबेडकर यांनी स्पष्ट केले की, “न्यायालयाच्या आदेशानुसार झोपडपट्टीधारकांना हक्काचे पर्यायी घर मिळेपर्यंत कोणत्याही घराला हात लावला जाणार नाही. हा मुंबईतील कष्टकरी, श्रमिक आणि हजारो झोपडपट्टीधारकांच्या संघर्षाचा विजय आहे.”

ऐन हिवाळ्याच्या तोंडावर निष्कासनाची नोटीस मिळाल्यामुळे भयभीत झालेल्या कुर्ला, चेंबूर आणि ट्रॉम्बे परिसरातील हजारो कुटुंबांना या निर्णयामुळे मोठा दिलासा मिळाला आहे.

संबंधित बातमी: दिवाळीत सर्वसामान्यांना मोठा दिलासा: एसटीची १५ टक्के हंगामी भाडेवाढ परिवहन मंत्र्यांनी फेटाळली