पुण्यात स्वारगेट बस स्थानक परिसरात गुन्हे शाखेची मोठी कारवाई; ६ किलो गांजासह दोघांना अटक, ४.२६ लाखांचा मुद्देमाल जप्त

पुणे: पुणे शहरात अंमली पदार्थांच्या विरोधात गुन्हे शाखेने धडक मोहीम सुरू ठेवली असून, स्वारगेट बस स्थानक परिसरात विक्रीसाठी आणलेला तब्बल ६ किलो २० ग्रॅम गांजा जप्त करण्यात आला आहे. या प्रकरणी गुन्हे शाखेच्या अंमली पदार्थ विरोधी पथक-२ ने दोघांना रंगेहाथ बेड्या ठोकल्या आहेत. त्यांच्याकडून गांजा, रोख रक्कम व मोबाईल फोन असा एकूण ४ लाख २६ हजार ३०५ रुपयांचा मुद्देमाल जप्त करण्यात आला आहे. अटक करण्यात आलेले आरोपी: १) आशिष रमेश शिंदे (वय २१ वर्षे, रा. बिबवेवाडी, पुणे) २) आशितोष उर्फ स्वप्निल सोमनाथ कांबळे (वय २७ वर्षे, रा. बिबवेवाडी, पुणे)

घटनाक्रम व कारवाई:

पुणे शहर हद्दीत अंमली पदार्थांची तस्करी व विक्री रोखण्यासाठी वरिष्ठांच्या सूचनेनुसार अंमली पदार्थ विरोधी पथक-२ चे पोलीस निरीक्षक जीवन माने यांच्या मार्गदर्शनाखाली सहायक पोलीस निरीक्षक अफरोज पठाण आणि त्यांचे पथक २८ ऑक्टोबर २०२६ रोजी गस्त घालत होते. स्वारगेट बस स्थानक परिसरात पेट्रोलिंग सुरू असताना, बस स्थानकाच्या पार्किंगमध्ये दोन संशयित तरुण थांबलेले आढळले. पथकाने तात्काळ दोघांना ताब्यात घेऊन त्यांची कसून झडती घेतली. यावेळी त्यांच्याकडे बेकायदेशीरपणे विक्रीच्या उद्देशाने बाळगलेला ३ लाख १ हजार रुपये किमतीचा ६ किलो ०२० ग्रॅम निव्वळ वजनाचा गांजा मिळून आला. याशिवाय त्यांच्याकडून २५ हजार रुपयांचे मोबाईल फोन आणि १५५ रुपयांची रोख रक्कम असा एकूण ४ लाख २६ हजार ३०५ रुपयांचा मुद्देमाल हस्तगत करण्यात आला. या प्रकरणी दोन्ही आरोपींविरोधात स्वारगेट पोलीस ठाण्यात एनडीपीएस (NDPS) कायद्याच्या विविध कलमांन्वये (गु.र.नं. ३७४/२०२६) गुन्हा दाखल करण्यात आला आहे.

तपास पथक: सदर कारवाई अपर पोलीस आयुक्त (गुन्हे) तेजस्वी सातपुते, पोलीस उप-आयुक्त (गुन्हे) गौहर हसन, आणि सहायक पोलीस आयुक्त (गुन्हे-३) शंकर खटके यांच्या मार्गदर्शनाखाली पार पडली. या कारवाईत वरिष्ठ पोलीस निरीक्षक जीवन माने, सहायक पोलीस निरीक्षक अफरोज पठाण, पोलीस अंमलदार योगेश कुंभार, संदीप देवकाते, सतीश चव्हाण, सुमित यादव, शरद धांडे, विनोद निंभोरे, प्रशांत कळसकर, महिला पोलीस अंमलदार सुरेखा साबळे, अजिंक्य जोजारे, देविदास वांढरे आणि दिनेश बास्टेवाड यांनी सहभाग घेतला.

संबंधित बातमी: पुण्यात वाहनांची तोडफोड करून दहशत माजवणारी टोळी गजाआड; गुन्हे शाखा युनिट २ कडून ३ जणांना बेड्या