नागपूर:- हिंगणा तालुक्यातील गोंडवाना पिंपरी परिसरात सुरू असलेल्या एका बनावट देशी-विदेशी दारूच्या कारखान्यावर राज्य उत्पादन शुल्क विभागाने छापा टाकून धडक कारवाई केली आहे. या कारवाईत सुमारे २४.६७ लाख रुपयांचा मुद्देमाल जप्त करण्यात आला असून ७ आरोपींविरुद्ध गुन्हा दाखल करण्यात आला आहे.
गुप्त माहितीच्या आधारे ‘माय टाऊन’मध्ये छापा
विभागीय भरारी पथकाला मिळालेल्या गोपनीय माहितीनुसार, गोंडवाना पिंपरी येथील ‘माय टाऊन सोसायटी’ (सेक्टर-८, बंगला क्र. १३३) येथे अवैध दारू गाळली जात होती. राज्य उत्पादन शुल्क नागपूर विभागाचे विभागीय उपायुक्त गणेश पाटील व जिल्हा अधीक्षक सुरज कुमार रामोड यांच्या मार्गदर्शनाखाली पथकाने या बंगल्यावर अचानक धाड टाकली. यावेळी तेथे बनावट मद्य तयार करण्याचे मोठे रॅकेट उघडकीस आले.
जप्त करण्यात आलेला मुद्देमाल
तपासादरम्यान पथकाने घटनास्थळावरून खालील साहित्य जप्त केले:
* १,०९० लिटर बनावट देशी दारूचा ब्लेंड.
* गोवा राज्यात विक्रीसाठी मर्यादित असलेल्या ‘गोवा व्हीस्की’च्या ३५६ बाटल्या.
* ९० बीएल बनावट देशी दारू.
* इलेक्ट्रॉनिक बॉटल सीलिंग मशीन, बनावट रॉकेट देशी दारूचे लेबल्स आणि बुचे.
* बनावट ‘रॉयल स्टग’ विदेशी दारूची बुचे आणि रिकाम्या बाटल्या.
* गुन्ह्यात वापरलेले एक चारचाकी वाहन.
एकूण जप्त किंमत: ₹२४,६७,७०४/-
मुख्य सूत्रधार फरार; ७ जणांवर गुन्हे दाखल
याप्रकरणी गुन्हा क्रमांक १९/२०२६ अन्वये एकूण ७ जणांविरुद्ध कारवाई करण्यात आली आहे.
१. शुभम गोविंद तिवारी (वय ३१) – मुख्य आरोपी (सध्या फरार)
२. गोविंद रामदत्त तिवारी (वय ५९)
३. शैलेंद्र धुर्वे (वय २४)
४. रघुनाथ उईके (वय २१)
५. राजकुमार उईके (वय २५)
६. द्वारका शिवलाल इनवाती (वय ४५)
७. प्रमोद नथ्थुजी सयाम (वय ४२)
ही यशस्वी कारवाई विभागीय भरारी पथकाचे निरीक्षक दशरथ क्षीरसागर, जगदीश पवार, लांबाडे, बालाजी चाळणेवार, वैभव दीवाण, अमित क्षीरसागर आणि शुभम ढोके यांच्या पथकाने केली. त्यांना जवान राहुल सपकाळ, गजानन राठोड, सुधीर मानकर, किरण वैद्य, सचिन आडोळे आणि विनोद डुंबरे यांनी सहकार्य केले. या प्रकरणाचा पुढील तपास दुय्यम निरीक्षक जगदीश पवार करत आहेत. अवैध मद्य निर्मिती, विक्री किंवा वाहतुकीबाबत काही माहिती असल्यास नागरिकांनी राज्य उत्पादन शुल्क विभागाच्या टोल फ्री क्रमांक १८००२३३९९९९ किंवा व्हॉट्सॲप क्रमांक ८४२२०MD०११३३ वर संपर्क साधावा. तक्रारदाराचे नाव गोपनीय ठेवले जाईल.
