वाघोली पोलिसांची उल्लेखनीय कामगिरी: तब्बल १२.७५ लाख रुपयांचे ५१ गहाळ मोबाईल व टॅब मूळ मालकांना केले परत

पुणे: पुणे शहर पोलिसांच्या वाघोली पोलीस ठाण्यातील सायबर पथकाने धडक कामगिरी करत नागरिकांचे गहाळ झालेले तब्बल ५१ मोबाईल फोन आणि टॅब शोधून काढले आहेत. सुमारे १२ लाख ७५ हजार रुपये किमतीचा हा सर्व मुद्देमाल हस्तगत करून तो मूळ मालकांना सन्मानाने परत करण्यात आला आहे. हरवलेले महागडे मोबाईल फोन पुन्हा हाती मिळाल्यामुळे नागरिकांनी पोलिसांचे मनापासून आभार मानले आहेत.

तक्रारींची गांभीर्याने दखल आणि तांत्रिक तपास

वाघोली पोलीस ठाण्याच्या हद्दीमधून नागरिकांचे विविध कंपन्यांचे महागडे मोबाईल फोन तसेच टॅब हरवल्याच्या वा गहाळ झाल्याच्या तक्रारी दाखल झाल्या होत्या. या तक्रारींची गंभीर दखल घेत वाघोली पोलिसांच्या सायबर विभागाने तातडीने तपास सुरू केला. सायबर पथकाने तांत्रिक विश्लेषणाचा (Technical Analysis) प्रभावी वापर केला तसेच विविध राज्यांतील स्थानिक पोलीस ठाण्यांशी समन्वय साधला. अथक प्रयत्नांनंतर पोलिसांनी विविध कंपन्यांचे ५१ मोबाईल फोन व टॅब असा एकूण १२ लाख ७५ हजार रुपयांचा मुद्देमाल यशस्वीरीत्या हस्तगत केला आणि संबंधित तक्रारदारांना पोलीस ठाण्यात बोलावून त्यांचे फोन परत सोपवले.

मार्गदर्शन व तपास पथक

सदरची उल्लेखनीय कामगिरी पुणे शहराचे अपर पोलीस आयुक्त (पूर्व प्रादेशिक विभाग) मनोज पाटील, पोलीस उपआयुक्त (परिमंडळ ७) अभिनाश कुमार आणि सहायक पोलीस आयुक्त (लोणीकंद विभाग) अनिता मोरे यांच्या मार्गदर्शनाखाली पार पडली.

या कारवाईमध्ये वाघोली पोलीस ठाण्याचे वरिष्ठ पोलीस निरीक्षक नंदकुमार गायकवाड, पोलीस निरीक्षक (गुन्हे) मंगेश जगताप, पोलीस निरीक्षक (गुन्हे) पल्लवी मेहेर, पोलीस अंमलदार सतीश बिरादार आणि महिला पोलीस अंमलदार वृंदावणी चव्हाण यांनी महत्त्वाची भूमिका बजावली.

संबंधित बातमी: PunePolice; पुणे पोलिसांची मोठी कारवाई: मोटारसायकल चोरी करणाऱ्या टोळीचा पर्दाफाश, ६ दुचाकींसह ४.९५ लाखांचा मुद्देमाल जप्त