भीमराव यशवंत आंबेडकर यांच्या उपस्थितीत बेंगळुरूमध्ये धम्मचक्र प्रवर्तन दिन उत्साहात; ४०० कुटुंबांकडून आंबेडकरी विचारांची परंपरा कायम

बेंगळुरू : धम्मचक्र प्रवर्तन दिनानिमित्त कर्नाटकची राजधानी बेंगळुरू येथे ‘सम्यक प्रबोधन प्रतिष्ठान’च्या वतीने आयोजित विशेष कार्यक्रमात महामानव डॉ. बाबासाहेब आंबेडकर यांचे नातू आणि ज्येष्ठ आंबेडकरी नेते भीमराव यशवंत आंबेडकर यांनी उपस्थित राहून जनसमुदायाशी संवाद साधला.

परराज्यात राहूनही आंबेडकरी चळवळ आणि महाराष्ट्राची सांस्कृतिक परंपरा अखंड सुरू ठेवणाऱ्या येथील मराठी बांधवांच्या उपक्रमाचे त्यांनी यावेळी विशेष कौतुक केले. ४०० मराठी कुटुंबांकडून विचार आणि संस्कृतीचे जतन महाराष्ट्रातून अनेक वर्षांपूर्वी उपजीविकेसाठी बेंगळुरू येथे स्थायिक झालेल्या मराठी बांधवांनी ‘सम्यक प्रबोधन प्रतिष्ठान’ची स्थापना केली आहे.

आजच्या घडीला बेंगळुरूमध्ये वास्तव्यास असलेली अंदाजे ४०० कुटुंबे या संस्थेच्या माध्यमातून आंबेडकरी चळवळीशी घट्ट जोडलेली आहेत. ही सर्व कुटुंबे चळवळीशी निष्ठा राखून महाराष्ट्राची संस्कृती आणि समतेचे विचार परराज्यातही जपत आहेत. पुढील पिढ्यांपर्यंत प्रबोधनाचा वारसा प्रतिष्ठानच्या वतीने दरवर्षी १४ एप्रिल रोजी डॉ. बाबासाहेब आंबेडकर जयंती, तथागत गौतम बुद्ध पौर्णिमा आणि ६ डिसेंबर रोजी महापरिनिर्वाण दिनानिमित्त अभिवादन कार्यक्रमांचे आयोजन केले जाते. या उपक्रमांच्या माध्यमातून बाबासाहेबांचे विचार आणि बुद्ध धम्माचा संदेश नव्या पिढीपर्यंत पोहोचवण्याचे मोलाचे कार्य ही संस्था अविरत करत आहे.

भीमराव आंबेडकर यांचे विचार उपस्थित जनसमुदायाशी संवाद साधताना भीमराव आंबेडकर म्हणाले की, “धम्मचक्र प्रवर्तन दिन हा डॉ. बाबासाहेब आंबेडकर यांनी दिलेल्या समता, स्वाभिमान आणि सामाजिक परिवर्तनाच्या विचारांचे स्मरण करून देणारा ऐतिहासिक दिवस आहे. महाराष्ट्र आणि कर्नाटकमध्ये भौगोलिक अंतर कितीही असले, तरी आपल्या विचारांशी, संस्कृतीशी आणि चळवळीशी जोडलेले राहण्याची खरी प्रेरणा अशा उपक्रमांमधून मिळते.” यावेळी त्यांनी सम्यक प्रबोधन प्रतिष्ठानच्या धम्मकार्याला मनःपूर्वक शुभेच्छा दिल्या.

‘नमो बुद्धाय! जय भीम! जय संविधान!’ या घोषणांनी कार्यक्रमाचा परिसर दुमदुमून गेला होता. या सोहळ्याला बेंगळुरू व परिसरातील नागरिक, महिला आणि कार्यकर्ते मोठ्या संख्येने उपस्थित होते.

संबंधित बातमी: दीक्षाभूमीवर येणाऱ्या अनुयायांची गैरसोय होणार नाही याची दक्षता घ्या: महसूल मंत्री तथा पालकमंत्री चंद्रशेखर बावनकुळे यांचे प्रशासनाला निर्देश