तुर्भेत अवैध इंधन चोरीचा भांडाफोड; ९४ लाखांच्या मुद्देमालासह दोन टँकर जप्त, ५ जणांवर गुन्हा दाखल

मुंबई : तुर्भे परिसरात सुरू असलेल्या अवैध इंधन उपशावर मुंबई-ठाणे शिधावाटप विभागाच्या भरारी पथकाने मोठी कारवाई केली आहे. एका टँकरमधून दुसऱ्या टँकरमध्ये बेकायदेशीररीत्या डिझेल भरत असताना पथकाने छापा टाकून दोन टँकरसह सुमारे १४ हजार लिटर डिझेल आणि २५ हजार लिटर पेट्रोलियमसदृश संशयास्पद द्रवपदार्थ असा एकूण तब्बल ९४ लाख ३६ हजार ७०८ रुपयांचा मुद्देमाल जप्त केला आहे. या प्रकरणी तुर्भे पोलीस ठाण्यात पाच जणांविरोधात गुन्हा नोंदवण्यात आला आहे.

रंगेहात पकडले डिझेलचे रॅकेट मिळालेल्या माहितीनुसार, तुर्भे परिसरातील एका मोकळ्या जागेत डिझेलची वाहतूक करणाऱ्या ‘WB 19 L 2981’ या टँकरच्या आउटलेटमधून अवैधरीत्या इंधन काढले जात होते. हे चोरलेले डिझेल ‘MH 46 BM 9202’ या दुसऱ्या टँकरच्या इंधन टाकीत भरले जात असल्याची खात्रीशीर माहिती भरारी पथकाला मिळाली होती. माहिती मिळताच पथकाने घटनास्थळी अचानक धाड टाकली असता हा संपूर्ण प्रकार रंगेहात उघडकीस आला.

जप्त केलेला मुद्देमाल कारवाईदरम्यान पथकाने खालील मुद्देमाल ताब्यात घेतला: * १४ हजार लिटर डिझेल * २५ हजार लिटर पेट्रोलियमसदृश संशयास्पद द्रवपदार्थ * अवैध इंधन उपशासाठी वापरण्यात आलेले दोन्ही मोठे टँकर * जप्त केलेल्या संपूर्ण मुद्देमालाची अंदाजे एकूण किंमत ९४ लाख ३६ हजार ७०८ रुपये आहे. वरिष्ठांच्या मार्गदर्शनाखाली मोहीम नियंत्रक शिधावाटप चंद्रकांत डांगे यांच्या मार्गदर्शनाखाली आणि उपनियंत्रक शिधावाटप (अंमलबजावणी) गणेश बेल्लाळे यांच्या नेतृत्वाखाली ही संयुक्त मोहीम राबवण्यात आली.

या कारवाईत नियंत्रक शिधावाटप व संचालक नागरी पुरवठा मुंबई कार्यालयाच्या भरारी पथकातील सहायक नियंत्रक शिधावाटप प्रदीप काळे, मुख्य निरीक्षण अधिकारी नागनाथ हंगरगे, शिधावाटप निरीक्षक अमोल बुरटे, दिपेंद्र परुळेकर, राहुल इंगळे आणि विकास नागदिवे यांनी महत्त्वाची भूमिका बजावली. अवैध इंधनाचा हा साठा नेमका कुठून आणला जात होता आणि तो कुठे विकला जाणार होता, या रॅकेटमध्ये आणखी कोणाचा हात आहे का, याचा अधिक तपास तुर्भे पोलीस करत आहेत.

संबंधित बातमी: संगमनेरमध्ये अन्न व औषध प्रशासनाचा धडक छापा: १५ लाखांचा संशयास्पद धनेडाळ व बडीशेपचा साठा जप्त; ‘फेस्टिव्हल ड्राईव्ह’ अंतर्गत मोठी कारवाई