अहिल्यानगर:- छत्रपती राजर्षी शाहू महाराज यांच्या जयंतीचे औचित्य साधून, जिल्ह्यातील प्रलंबित जात वैधता प्रमाणपत्रांतील त्रुटी दूर करण्यासाठी जिल्हा जात प्रमाणपत्र पडताळणी समितीच्या वतीने २४ व २५ जून २०२६ रोजी दोन दिवसीय विशेष शिबिराचे आयोजन करण्यात आले आहे. ऑनलाइन प्रणालीद्वारे त्रुटी कळवूनही अद्याप कागदपत्रांची पूर्तता न केलेल्या अर्जदारांनी या सुवर्णसंधीचा लाभ घ्यावा आणि आवश्यक कागदपत्रांसह कार्यालयीन वेळेत समिती कार्यालयात उपस्थित राहावे, असे आवाहन समितीच्या अध्यक्षा तथा अप्पर जिल्हाधिकारी मोनिका सिंह, उपायुक्त राकेश पाटील व सदस्य सचिव अनिल तिदमे यांनी संयुक्तपणे केले आहे.
विद्यार्थी आणि सेवाविषयक प्रकरणांसाठी महत्त्वाची सूचना
१२ वी विज्ञान शाखेची परीक्षा उत्तीर्ण झालेल्या आणि सध्या सीईटी (CET) च्या माध्यमातून व्यावसायिक अभ्यासक्रमांसाठी (इंजिनिअरिंग, मेडिकल, फार्मसी इ.) प्रवेश घेऊ इच्छिणाऱ्या विद्यार्थ्यांसाठी हे शिबिर अत्यंत महत्त्वाचे आहे. प्रवेश प्रक्रियेदरम्यान होणारी धावपळ व शैक्षणिक नुकसान टाळण्यासाठी विद्यार्थ्यांनी आपल्या जात पडताळणी प्रस्तावांची हार्ड कॉपी तात्काळ समितीच्या कार्यालयात सादर करावी.
तसेच, सेवाविषयक (नोकरी संदर्भातील) प्रकरणांमध्ये ज्या अर्जदारांना ऑनलाइन पद्धतीद्वारे त्रुटींविषयी कळविण्यात आले आहे, त्यांनीही विनाविलंब कार्यालयात येऊन आपल्या प्रस्तावाची हार्ड कॉपी सादर करणे बंधनकारक आहे.
अर्जदारांसाठी समितीच्या मार्गदर्शक सूचना:
मध्यस्थांपासून दूर राहा: जात पडताळणी प्रक्रियेसाठी अर्जदारांनी कोणत्याही खाजगी सेतू चालक किंवा इतर त्रयस्थ व्यक्तींवर (एजंट्स) अवलंबून राहू नये.
अचूक संपर्क माहिती: ऑनलाइन अर्ज भरताना स्वतःचा अथवा पालकांचा अचूक ई-मेल आयडी आणि चालू दूरध्वनी क्रमांकच नमूद करावा.
नोंदणी तपशील जपून ठेवा: अर्ज करताना मिळालेले युजरनेम (Username) आणि पासवर्ड (Password) स्वतःकडे सुरक्षित जतन करून ठेवावेत.
नोंदणीकृत वंशावळ: शपथपत्रातील वंशावळ ही केवळ आणि केवळ संबंधित अधिकृत व वैध कागदपत्रांच्या आधारेच तयार केलेली असावी.
समितीची वर्षभरातील उल्लेखनीय कामगिरी
जिल्हा जात प्रमाणपत्र पडताळणी समितीने गतवर्षभरात अत्यंत वेगाने आणि पारदर्शकतेने काम केले आहे. जून २०२५ ते मे २०२६ या एका वर्षाच्या कालावधीत समितीकडे एकूण ३८ हजार २०२ प्रकरणे प्राप्त झाली होती. त्यापैकी तब्बल ३६ हजार ०४८ प्रकरणांचा यशस्वीपणे निपटारा करण्यात आला आहे. सध्या केवळ २ हजार १५४ प्रकरणे प्रक्रियेत असून, या प्रलंबित प्रकरणांमधील त्रुटी दूर करण्यासाठीच या विशेष शिबिराचे आयोजन करण्यात आले आहे.
प्रलंबित अर्जदारांनी या दोन दिवसांत आपल्या त्रुटींची पूर्तता करून आपले जात वैधता प्रमाणपत्र निश्चित करावे, असे प्रशासनातर्फे सांगण्यात आले आहे.
